أقامت الملكة رانيا العبدالله، في الديوان الملكي الهاشمي – مضارب بني هاشم، حفل عشاء بمناسبة قرب زفاف الأمير الحسين بن عبدالله الثاني، ولي العهد، والآنسة رجوة آل سيف.
وتخلل الحفل، الذي حضرته العديدات من الأميرات، والأميرة إيمان بنت عبدالله الثاني، والأميرة سلمى بنت عبدالله الثاني، وعدد من أفراد عائلة آل سيف، ومدعوات من مختلف محافظات المملكة، رسم الحناء، وزفة العروس، وأغاني وأهازيج تراثية وشعبية أردنية وسعودية، شاركت في أدائها نداء شرارة وزين عوض وديانا كرزون، وفرق: "مسك"، و"شابات السلط" للفنون الشعبية، و"حليم للموسيقى".
ورحبت الملكة رانيا بالحضور، فقالت: "أهلاً وسهلاً فيكم، مبسوطة إنكم هون حتى تشاركونا فرحتنا. يعني الحمد لله اليوم كثير عزيز علينا، ولعيلتنا الكبيرة بقول: إن ما وسعتكم بيوتنا بتوسعكم قلوبنا والفرحة واحدة. حسين ابنكم وانتوا أهله وهذا عرسكم. حسين هو فرحتي الأولى، ابني البكر... وزي أي أم أنا من زمان بحلم أشوفه عريس والحمد لله اليوم بلشنا احتفالاتنا بعرسه، وان شاء الله، الله يتمم على خير".
وأضافت: "وأخيراً صار عندي كِنة! بس مش أي كِنة ما شاء الله عليها رجوة يعني ما بعرف في أحلى أو ألذ منها العروس؟ جد غلاوتها من غلاوة إيمان وسلمى. بتذكر من أكمن شهر لمّا خبرنا حسين سيدنا وأنا أنه نوى يتزوج قديش كانت فرحتنا. رجوة هي أحلى رجاء مني لرب العالمين لحسين".
وقالت للآنسة رجوة: "إن شاء الله.. يا رب الله يسعدكم ويوفقكم ويخليكم لبعض. وإن شاء الله دايماً بتكونوا سند وفرحة بعض".
وتوجهت بالحديث إلى والدة العروس بالقول: "أم فيصل، إحنا عنا بنقول دايماً بتعرفوا البنت من أمها وأنا بحكيلكم الأم جوهرة، (عزة) أنا بعرف أنا كنت محلك قبل شهرين وبعرف شعورك... بس بدي أطمنك إنه رجوة بعيونا وبعيون حسين وهي بين أهلها وناسها، فاطمئني عليها".
وأضافت: "بتعرفوا إحنا كأمهات، إيش بدنا من الدنيا غير أنه نشوف أولادنا مبسوطين ومرتاحين. ويمكن إحنا مرات بنراجع حالنا ونسأل هل إحنا عملنا كل اللي بنقدر عليه؟ وأنا، سيدنا المغفور له الملك الحسين الله يرحمه، قبل ما يتوفى لما كان بالمستشفى وعرفنا إنه تعبان، أنا وعدته وعد، قلتله حسين رح يتربى زي ما أنت بدك".
وزادت: "فاليوم بطلع على حسين، بشوف قدامي شاب جندي شجاع واثق من نفسه قوي، بشوف كيف يعني كوالده، بشوف كيف أسلوبه، أسلوب تعامله مع عروسته ومع عرسه، كيف حابب إنه هذا العرس يكون بمشاركة أردنية مش بس بالاحتفالات، لكن بالتحضيرات كمان".
وقالت: "هو فعلاً شاب هاشمي واعي، وعارف إنه هو منكم وإلكم، وان شاء الله وفيت وعدي للملك حسين، وإن شاء الله يكون هو راضي، وإن شاء الله كلكم تكونوا راضيين، وألف مبروك إلنا جميعاً لأنه هاي فرحتكم قبل ما تكون فرحتنا.. وأهلاً وسهلاً فيكم مرة ثانية".
وقدمت المدعوات التهاني والتبريكات إلى الملك عبدالله الثاني، والملكة رانيا، والأمير الحسين، والآنسة رجوة.